ନାବାଳିକାକୁ ଅପହରଣ ପରେ ଦୁଷ୍କର୍ମ…
ମାଲକାନଗିରି (ସଖପ୍ର): ମାଲକାନଗିରିରେ ନାବାଳିକାକୁ ଅପହରଣ ପରେ ଦୁଷ୍କର୍ମ କରିଥିବା ଅଭିଯୋଗରେ ମନୋଜ ବୈରାଗୀଙ୍କୁ ଗିରଫ କରିଛି ପୋଲିସ । ମିଳିଥିବା ସୂଚନା ଅନୁସାରେ ମାଲକାନଗିରି ଜିଲ୍ଲା ସଦର ମହକୁମା ପ୍ରଧାନୀଗୁଡାର ଗ୍ରାମର ଜଣେ ନାବାଳିକାଙ୍କୁ ରାତ୍ରୀରେ ତାଙ୍କ ଘରେ ପରିବାର ଲୋକଙ୍କ ସହ ଶୋଇଥିବା ସମୟରେ ଘର ଭିତରେ ପଶି ନାବାଳିକାର ପାଟିକୁ ଚାପି ଧରି ଏମ ଭି -୨ ଗ୍ରାମର ମନୋଜ ବୈରାଗୀ ଓ ଅନ୍ୟ ଏକ ଗ୍ରାମର ଖଗୁ ଉଡ଼ୁଲିୟାଙ୍କ ସହ ମିଶି ନାବାଳିକାଙ୍କୁ ତାଙ୍କ ଘରୁ ଅପହରଣ କରିଥିଲେ । ଅପହରଣ ପରେ ନାବାଳିକା ଜଣକୁ ନିକଟବର୍ତ୍ତୀ ଜଙ୍ଗଲରେ ରଖି ସେମାନେ ନାବାଳିକା ସହ ବାରମ୍ବାର ଦୁଷ୍କର୍ମ କରୁଥିଲେ । ଏହି କଥା କାହାକୁ କହିଲେ ଦୁଷ୍କର୍ମ ପୀଡିତାଙ୍କୁ ଜୀବନରେ ମାରି ଦେବାର ଧମକ ମଧ୍ୟ ଦେଇଥିଲେ । ଗତକାଲି ରାତିରେ ମନୋଜ ନାବାଳିକାକୁ ନିଜ ଘର ଏମ. ଭି -୨ କୁ ଆଣି ରଖିଥିଲା । ଏହି ଖବର ପାଇବା ପରେ ପରିବାର ଲୋକେ ମାଲକାନଗିରି ଆଦର୍ଶ ଥାନାରେ ମନୋଜଙ୍କ ନାମରେ ଏକ ଲିଖିତ ଅଭିଯୋଗ କରିଥିଲେ । ଲିଖିତ ଅଭିଯୋଗ ଆଧାରରେ ଆଦର୍ଶ ଥାନା ଅଧିକାରୀ କେସ ନମ୍ବର -245 ରୁଜୁ କରି, ବିଳମ୍ବିତ ରାତିରେ ମନୋଜଙ୍କ ଘରୁ ନାବାଳିକାଙ୍କୁ ଉଦ୍ଧାର କରିଥିଲେ । ଦେଖିବାକୁ ବାକି ରହିଲା ଆଗକୁ ଘଟଣା କେଉଁ ମୋଡ ନେଉଛି ।
ମାଲକାନଗିରି ପ୍ରତିନିଧି ପୂର୍ଣ୍ଣଚନ୍ଦ୍ର ତ୍ରିପାଠୀ
ସବୁବର୍ଗ ଖବର
